ԿԳՄՍ նախարար Ժաննա Անդրեասյանի այցը Էստոնիա մայիսի 19-21-ը, 2025թ․

23 մայիսի, 2025

ՀՀ ԿԳՄՍ նախարար Ժաննա Անդրեասյանի գլխավորած պատվիրակությունը մայիսի 19-21-ը այցելեց Էստոնիա։

Պատվիրակությանն էր միացել նաև Լիտվայում ՀՀ արտակարգ և լիազոր դեսպան Արա Մարգարյանը։

Նախարարի և պատվիրակության այցը Էստոնիա մենկարկեց Տարտուից:

Նախարարը հանդիպեց Տարտուի քաղաքապետ Ուրմաս Կաասին, այցելեց Տարտուի հանրահայտ համալսարան, որտեղ հանդիպում կայացավ պրոռեկտոր դոկտոր Մոորայի և ուսանողների հետ:

Նախարարի այցի առիթով պատմական ցուցադրություն բացվեց Տարտուի արվեստի թանգարանում։ Պահոցից հանվեց և հանրության ուշադրությանը մատուցվեց Խաչատուր Աբովյանի կողմից համալսարանին նվիրաբերված 13-րդ դարի շարակնոցը: Այն չէր ցուցադրվել ավելի քան 30 տարի:

Բացման արարողությանը ներկա էր ՀԱԵ Բալթյան երկրների թեմի առաջնորդ՝ Գերաշնորհ Տեր Վազգեն արքեպիսկոպոս Միրզախանյանը։

Էստոնիայի Հանրապետություն կատարած պաշտոնական այցի շրջանակում ԿԳՄՍ նախարար Ժաննա Անդրեասյանն այցելել է Տարտուի մի շարք կրթական և մշակութային հաստատություններ։

Նախարարը եղավ Տարտուի ազգային արխիվում, որտեղ պատվիրակությանը ներկայացվել են արխիվի գործունեությունը, թվայնացման գործընթացները, վերականգնողական աշխատանքները, որոնք իրականացվում են լաբորատոր պայմաններում։

Այցի ընթացքում նախարարն անդրադարձել է նաև Մ. Մաշտոցի անվան Մատենադարանում ձեռագրերի թվայնացման հնարավորություններին։ Քննարկվել են մասնագետների փորձի փոխանակման և վերապատրաստումների կազմակերպման հնարավոր ուղղությունները։

Պատվիրակությանը ներկայացվել են Տարտուի ազգային արխիվում պահվող՝ Հայաստանի մշակույթի և հայ ուսանողների համագործակցությանն առնչվող 1912-1916 թթ. արխիվային արժեքավոր նյութեր։

Կայացավ ԿԳՄՍ նախարարի հանդիպումը Էստոնիայի մշակույթի նախարար Հեյդի Պուրգայի հետ

Նախարարները քննարկել են Հայաստան-Էստոնիա մշակութային կապերի զարգացման հարցերը՝ շեշտելով հատկապես համագործակցությունը միջազգային կազմակերպությունների՝ ՅՈՒՆԵՍԿՕ-ի, Եվրոպայի խորհրդի «Մշակութային ուղիների» շրջանակում: Կարևորվել է տարբեր ոլորտներում համատեղ մշակութային ծրագրերի իրականացումը՝ ստեղծելով միջմշակութային երկխոսության և փորձի փոխանակման նոր հարթակներ:

Նախարարն անդրադարձել է Հայաստանում ստեղծարար արդյունաբերության մեծ ներուժին՝ նշելով, որ եթե միջազգային ինտեգրումը և տեղական տաղանդների խրախուսումը շարունակվեն, այդ ոլորտը կարող է դառնալ երկրի տնտեսական զարգացման առանցքային ճյուղերից մեկը:

Կարևորվել են համատեղ ցուցահանդեսներ, համերգային ծրագրեր կազմակերպելու հեռանկարները՝ համապատասխանաբար թանգարանների և համերգային կազմակերպությունների միջև համագործակցությամբ: Այս համատեքստում կարևորվել են միջթանգարանային համագործակցության խթանումն ու ոլորտի զարգացումը:

Ժաննա Անդրեասյանը ներկայացրել է Հայաստանում նախորդ տարի ստեղծված Մշակույթի զարգացման հիմնադրամի գործունեությունը: Նրա խոսքով՝ նոր կառույցը նպատակ ունի բարելավելու թանգարանային ոլորտի կառավարումը ու մարքեթինգային քաղաքականությունը՝ խթանելով նաև թանգարանային ոլորտի միջազգայնացումը:

Կողմերն առանձնակի կարևորել են նաև կինոյի ոլորտում համագործակցությունը՝ խրախուսելով համատեղ ֆիլմարտադրության նախագծերն ու մասնակցությունը, մասնավորապես՝ Տալինի «Սև գիշեր» և Երևանի «Ոսկե ծիրան» միջազգային կինոփառատոներում:

Նախարար Ժաննա Անդրեասյանն այցելել է Էստոնիայի միջազգային զարգացման կենտրոն (ESTDEV), հանդիպել տնօրեն Քլեն Ջերաթսի հետ:

Քլեն Ջերաթսը ներկայացրել է կենտրոնի գործունեությունը և նշել, որ ESTDEV-ի գործունեությունը միտված է խթանելու թվայնացման գործընթացը, տնտեսական նորարարություններն ու կրթության զարգացումը:

Այս համատեքստում կողմերը քննարկել են դպրոցական և բուհական կրթական համակարգերի թվայնացման, մասնագիտական կրթության արդիականացման, դպրոցներում կայուն զարգացման հարցերը:

Նախարարն ընդգծել է, որ ՀՀ-ում ընթացող կրթության ոլորտի բարեփոխումներում մեծ տեղ է տրվում թվայնացմանը և անդրադարձել է հանրակրթության նոր չափորոշչի ներդրմանը, հանրակրթության ոլորտի արդյունավետ կառավարմանն ուղղված մեխանիզմների ներդրմանը և այլն:

Նախարար Անդրեասյանն այցելել է նաև Էստոնիայի էլեկտրոնային կառավարման ակադեմիա, ծանոթացել կառույցի գործունեությանը: Նշվել է, որ Էլեկտրոնային կառավարման ակադեմիան հասարակությունների թվային վերափոխման առաջատար խորհրդատվական կազմակերպություն է՝ միտված թվային ծառայությունների ամբողջական շրջանակի ստեղծմանը:

Նախարարը բարձր է գնահատել ակադեմիայի գործունեությունը՝ նշելով, որ Հայաստանում ևս մի շարք ոլորտներում ակտիվորեն իրականացվում է թվայնացման գործընթաց:

Անդրեասյանն այցելել է նաև Կումու ազգային արվեստի թանգարան, որը համարվում է Բալթիկայի և Հյուսիսային Եվրոպայի մեծագույն թանգարաններից մեկը։

Այցի ընթացքում թանգարանի տնօրեն Կադի Պոլլին նախարար Ժաննա Անդրեասյանին ներկայացրել է թանգարանի կառավարման համակարգը, քննարկվել է Հայաստանի ազգային պատկերասրահի և Կումու թանգարանի միջև համագործակցության հնարավորությունը։

Նախարար Անդրեասյանն անդրադարձել է Հայաստանի ազգային պատկերասրահի գործունեությանը՝ ընդգծելով համատեղ ցուցադրությունների կազմակերպման կարևորությունը։

Նախարարը Կումու թանգարանի պատվիրակությանը հրավիրել է Հայաստան՝ հետագա համագործակցության ուղղությամբ գործնական պայմանավորվածությունների ձեռքբերման նպատակով։

Եվրոպական թանգարան մրցանակի արժանացած Կումու թանգարանում ցուցադրվում են ինչպես մշտական, այնպես էլ ժամանակավոր հավաքածուներ։ Թանգարանի հիմնական հավաքածուն ընդգրկում է Էստոնիայի մշակույթը՝ սկսած 18-րդ դարից մինչև նախորդ դարի 90-ական թվականներ՝ ներառյալ խորհրդային շրջանը:

Այցի ընթացքում նախարարն այցելել է Էստոնիայի «Մաշտոց» հայկական դպրոց, ծանոթացել հաստատության գործունեությանը, հանդիպել ուսուցիչների և աշակերտների հետ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր